රිදී දිය රැළි බිඳී - Ridee Diya Rali Bindee

සඳ එළිය බිඳි බිඳී වැව් තලේ රැළි නගයි 

විශ්‍රාම ශාලාව මිනිස් සුවඳින් පිරෙයි 

තැන තැන වැටී නිදන වන්දනා නඩයේ 

නිදි නොමැති මහලු පියවරුන් සාමීචියේ 

ටැප් වතුර වැඩක් නෑ වැවෙන් නාගමු අපි 

අපොයි ඔව් මාත් මේ කියන්න ම හිටියේ 

ලොවම නිදි රෑ යමේ සියලු රෙදි පිළි උනා 

වැවට පැන ජබොස් ගා දිය කෙළිමු යොවුනන් ව 

දෙහෙදු කර රිදී දිය බුං ගසා ජය ගොසින 

ගොඩට විත් සඳ දියෙන් දිලෙන නිරුවත් සිරුරු 

දැකගතිමු වසාගත් නෙක රහස් මකා දා 

ගංදියේ මංකඩේ එදා ගැටවුන් ලෙසේ 

හවස් කල හීං මෙදියෙන් ම නාවද්දි 

ඇඳුම් බාගෙට උනා ඉළූ හැටි සුදු සබන් 

බලා වටපිට අලුත් ඇඳුම් ඇන්දූ අයුරු 

සිහිපත් ව සිනාවක් නැගී සෙලුවට එබෙමි